On Saturday, 17th September, 2011, Archbishop Paul Cremona O.P. attended the Opening of the Pastoral Year of the Vocations Centre, at the Seminary in Tal-Virtu.
Fr. Michael Bellizzi, director of the Vocations Centre shared his thoughts and the work carried out by this centre, with the readers of this website.
“Minnufih telqu kollox … u marru warajh”
Illum għandna ħafna affarijiet importanti x’nagħmlu. Imma kollox huwa importanti ndaqs? Bħala nsara lkoll ġejna msejħin biex nieħdu impenn pubbliku li nibnu s-Saltna ta’ Alla, u b’hekk ngħinu lil Ġesù jkompli l-missjoni tiegħu fid-dinja.
Waħda mill-mistoqsijiet li lkoll se jkollna nwieġbu xi darba f’ħajjitna hi: “Alla xi jrid minni?” Din hi domanda li fiċ-Ċentru tal-Vokazzjonijiet tas-Seminarju nippruvaw inressqu quddiem l-adolexxenti u ż-żgħażagħ li niltaqgħu magħhom.
Avolja l-attività taċ-Ċentru tibqa’ għaddejja sajf u xitwa — bl-impenn ta’ bosta seminaristi, u anke lajċi, li jiġu jagħtu daqqa t’id — ix-xhur tas-sajf ikunu tassew xi ħaġa speċjali. Matul is-sena jkollna laqgħat kull xahar għat-tfal subien li jkunu fil-Form 1 u 2. Dawk minn Form 3 ‘il fuq ikollhom live-in kull term, waqt li dawk li jkunu mill-età tal-Form 6 ‘il fuq ikollhom live-in kull xahar. Imma fis-sajf nippruvaw nagħtu esperjenza ta’ live-in lil kulħadd. Dan is-sajf kellna 13-il live-in li għalihom attendew madwar 240 student.
Xieraq li nirringrazzjaw lil Alla u lil xulxin tal-esperjenza li għamilna flimkien. Niċċelebraw ukoll il-familja — ladarba l-ġenituri għandhom post tant importanti biex l-ulied jiskopru u jikbru fis-sejħa li Alla jkun qed jagħmlilhom. Fl-aħħar attività tas-sajf, flimkien ma’ Mons. Arċisqof — li huwa l-promotur ewlieni tal-vokazzjonijiet fid-djoċesi — ninġabru biex niċċelebraw l-Ewkaristija u inġeddu l-impenn tagħna li nibqgħu infittxu r-rieda ta’ Alla u nwettquha f’ħajjitna.
Is-saċerdoti Maltin flimkien mal-Arċisqof qed iwettqu ħidma li bdiet meta Ġesù bagħat lill-Appostli tiegħu ma’ kullimkien. Din il-missjoni ma waqfet qatt u jeħtieġ tkompli llum ukoll. Is-sejħa biex tkun qassis hija rigal kbir, u ġġib ferħ kbir — lil min jirċeviha u lill-poplu nisrani kollu.
Fis-seminarju ta’ Malta, dan ix-xahar se jibdew żewġ seminaristi ġodda. Ħamsa oħra se jkunu qed jagħmlu sena esperjenza barra mis-seminarju, waqt li seba’ qed iħejju biex ikunu ordnati djakni f’Ottubru li ġej. Grupp ieħor ta’ sitt żgħażagħ se jibdew żmien ta’ preparazzjoni qabel jidħlu s-seminarju s-sena li ġejja, jekk Alla jrid.
CLICK HERE to read the Archbishop’s Message on this occasion.