Lone Survivor

****

Direttur:          Peter Berg
Atturi:              Mark Wahlberg, Taylor  Kitsch, Emile Hirsch, Ben Foster u Eric Bana
Ħin tal-Film:    121 min
Maħruġ minn KRS Film Distributors
 
KLASSIFIKA TAĊ-ĊENSURA:                 15
KLASSIFIKA TAL-KNISJA:                      18
 
Film msejjes fuq ġrajja vera li seħħet gewwa  Afghanistan f’Gunju tal-2005. Marcus Luttrell, membru fin-Navy Seal Amerikana, flimkien ma’ tlieta minn sħabu, Michael Murphy, Danny Dietz u Matt Axelen, jiġu affdati missjoni delikata ħafna u perikoluża għall-aħħar u  li kienet sejra tipprova sewwa l-ħila  ta’ dawn l-erba’ qalbenin. Il-missjoni kienet li jaqbdu jew joqtlu wieħed mill-mexxejja magħrufa tat-Talabani,  Ahmed Shahd,  li reċentament kien responsabbli għall-mewt ta’ għoxrin morin. Fil-bidu kollox mar sew sakemm ġew mikxufa minn xi rgħajja u minħabba l-Konvenzjoni Internazzjonali ma setgħux jagħmlu mod ieħor ħlief li jħalluhom immorru b’riżultat li wieħed minnhom jallarma  t-Talabani li kienu nvadew ir-raħal ċkejken fejn kien maħsub li kien jinsab Ahmed Shahd. Ma tantx jgħaddi ħin li dawn l-erba’ suldati ma jsibux ruħhom attakkati minn numru kbir ta’ terroristi, armati sa snienhom. Meta wieħed minnhom jirnexxielu jikkomunika mal-bażi: Bagram Airfield,  biex tintbagħat  għajnuna u rinforz, din fil-fatt ma ddumx ma tasal iżda wieħed mill-helikopters ġie mwaqqa’ b’riżulat li ftit li xejn kien hemm tama li dawn l-erba’ jeħilsuha ħafif. Fi żmien qasir, tlieta minnhom jisfgħu maqtula u jibqa’ biss Marcus Luttrell li jibqa’  jissielet għal ħajtu u jkun kapaċi b’xorti tajba li jirrakonta l-ġrajja mdemma u tal-biza` li hu u sħabu għaddew minnha. Kienet l-għajnuna li huwa rċieva mir-raħħala stess li kienu kontra t-Talabani li għenu mhux bil-ftit li jsalvawlu ħajtu. X’jiġri meta t-Talabani jsiru jafu li Marcus kien jinsab moħbi fir-raħal?

Film maħdum tajjeb ħafna, realistiku għall-aħħar, b’ħafna xeni ta’ ġlied imdemmi u vjolenza brutali li ma taqta’ xejn  matul il-film.  Minnħabba l-istorja nfisha,  kif ukoll kliem goff u dagħa, ikun tajjeb li l-film jarawh dawk li għalqu t-tmintax –il sena.