L-omelija tal-Isqof Joseph Galea-Curmi
“Ħarsu lejn is-siġra tat-tin u s-siġar l-oħra” (Lq 21:29). Dan hu li jgħid Ġesù lid-dixxipli tiegħu, u Ġesù kien spiss juża l-eżempji ta’ dak li tara fil-ħolqien biex, permezz ta’ dan, iwassal il-messaġġ tiegħu. Diġà hu messaġġ fih innifsu meta Ġesù jgħid “Ħarsu lejn is-siġar tat-tin u s-siġar l-oħra”, għax hemmhekk jurina kif kien jgħożż il-ħolqien ta’ Alla.
L-ewwel messaġġ li għandna nieħdu hu li l-ħolqien qiegħed hemm biex aħna ngħożżuh u nipproteġuh, mhux biex nirrovinawh. Għaliex jekk is-siġra u s-siġar ma jfissru xejn għalina, u nispiċċaw biex neqirduhom ħalli minflokhom nagħmlu xi ħaġa tagħna, hemmhekk nuru kemm ma aħniex tassew nimxu fuq dan li jgħid Ġesù, li napprezzaw il-ħolqien ta’ Alla. Dan jgħaqqad ħafna ma’ dak li għedna fis-Salm illum (mill-Ktieb ta’ Danjel: 3), meta semmejna l-ħolqien ta’ Alla – muntanji, għoljiet, kull ma jinbet fl-art, għejun, ibħra u xmajjar, u l-annimali wkoll – u ta’ dan infaħħru lil Alla. Kemm hu importanti, għalhekk, li aħna nagħrfu r-responsabbiltà li għandna li nipproteġu l-ħolqien, ma neqirduhx, u dan iwassalna wkoll biex nagħrfu l-kobor ta’ Alla.
Meta Ġesù qed jgħid lid-dixxipli tiegħu “Ħarsu lejn is-siġra tat-tin”, qed isemmi siġra li hemmhekk, fil-Lvant, kienet popolari, u li verament kienet tagħtihom dan il-messaġġ, kif jgħid Ġesù: “Malli tarawhom jarmu, intom stess tintebhu li s-sajf diġà fil-qrib” (Lq 21:30) – jiġifieri li ġej staġun ieħor. U aħna nafu li meta nħarsu lejn is-siġar, qed inħarsu lejn dak li qed jiġri b’mod naturali. Mhijiex xi ħaġa li tagħmel ħafna storbju u ħafna spettaklu. Is-siġra ma tgħidlekx “ara x’se nagħmel jien” u tagħmel xi ħaġa li tolqot l-ġħajn, imma l-proċess naturali. U dan li qed jgħid Ġesù: meta aħna nħarsu lejn dak li qed jiġri, f’dak li jiġri stess naraw is-saltna ta’ Alla kif tikber u tissaħħaħ. Alla mhuwiex Alla li jagħmel storbju u sinjali kbar tal-preżenza tiegħu, imma narawh fil-qrib proprju fil-ħajja ta’ kuljum. U l-messaġġ li jagħti Ġesù hawnhekk hu biex aħna nfittxuh fl-affarijiet sempliċi, tal-ħajja ta’ kuljum, dawk is-sinjali żgħar, bħalma meta tara l-ħolqien ta’ Alla. Din li kultant aħna aktar ninġibdu lejn dak li hu spettakolari, lejn xi ħaġa li hi speċjali, mhijiex kif jindikalna Ġesù – ħarsu lejn dak li hu naturali u sempliċi.
Ġesù jagħtina messaġġ importanti ħafna f’dan l-Evanġelju, meta jgħid: “Is-sema u l-art jgħaddu, imma kliemi ma jgħaddix” (Lq 21:33). Ġesù qed jagħmel id-differenza, li tant hi importanti f’ħajjitna, bejn dak li jgħaddi u dak li ma jgħaddix – biex aħna norbtu qalbna mhux ma’ dak li jgħaddi imma ma’ dak li ma jgħaddix, u nużaw dak li jgħaddi b’mod li qatt ma nitilfu dak li jibqa’. Meta Ġesù qed jgħid “kliemi ma jgħaddix”, qed jgħid xi ħaġa tant importanti għalina, għax aħna l-kelma tiegħu nisimgħuha, naqrawha, tolqotna, imma kultant qisna nieħdu l-impressjoni, minħabba ċ-ċirkustanzi li ngħixu fihom u minħabba dak li jiġri, li l-kliem ta’ Ġesù hu sabiħ, imma mbagħad biex tgħixu hu diffiċli, biex tgħixu mhux dejjem hu realistiku. Ġesù qed jgħid: mhux hekk. Il-kliem tiegħu ma jgħaddix. Jiġifieri meta aħna nimxu ma’ dak li jgħid hu, hemmhekk għandna l-ħajja issa, u dik li twassalna għall-ħajja ta’ dejjem. Bħalma kien qallu San Pietru darba, meta ħafna min-nies, minħabba kliem Ġesù, telquh, u Ġesù lill-appostli tiegħu qalilhom “Tridux titilqu intom ukoll?” (Ġw 6:67), u Pietru kien qallu: “Mulej, għand min immorru? Inti għandek il-kliem tal-ħajja ta’ dejjem” (Ġw 6:68).
Din lilna tgħinna biex meta ngħixu l-kliem ta’ Ġesù, niftakru li qed ngħixu dak li jibqa’. Meta Ġesù jsemmilna, per eżempju, li għandna ngħixu b’imħabba u b’rispett lejn l-oħrajn, ma nweġġgħuhomx bi kliemna u bl-azzjonijiet tagħna; li għandna naħfru lil min jagħmlilna d-deni; li għandna naħdmu għall-ġustizzja, għandna naħdmu għar-rispett għall-ħajja u d-dinjità tal-bniedem; li għandna nfittxu li nkunu onesti u integri f’dak li nagħmlu, mhux naqilbu l-affarijiet rashom ’l isfel biex niġbdu lejna – tant tagħlim sabiħ li Ġesù jagħtina bil-kliem tiegħu, u qed jgħidilna: Dan kliemi li ma jgħaddix. Ma’ dan għandkom torbtu qalbkom, u dan għandkom tfittxu li tgħixu fil-ħajja tagħkom.
Nitolbu lill-Mulej illum, ispirati minn din il-kelma sabiħa tiegħu, li aħna norbtu qalbna miegħu u mal-kliem tiegħu li ma jgħaddix. U dejjem nagħmlu dik id-distinzjoni tant importanti f’ħajjitna bejn dak li jgħaddi u dak li jibqa’ għal dejjem. Nużaw tajjeb dak li jgħaddi b’mod li qatt ma nitilfu dak li jibqa’ għal dejjem.
✠ Joseph Galea-Curmi
Auxiliary Bishop of Malta
