L-omelija tal-Arċisqof Charles Jude Scicluna
Ġesù jitkellem dwar il-miġja tiegħu; is-siegħa li fiha jiġi Bin il-Bniedem. Fl-ewwel parti tal-Avvent, propju niftakru u nikkommemoraw din il-miġja ta’ Ġesù li għadha ma seħħitx. Wara l-konsagrazzjoni, f’waħda mill-akklamazzjonijiet li ngħidu, nitolbu hekk:
“Inħabbru l-mewt tiegħek Mulej,
Inxandru bil-ferħ il-qawmien tiegħek
Nistennewk sa ma tiġi fil-glorja.”
Dan il-mument, li nitolbuh fil-quddiesa, infakkru lilna nfusna li aħna qegħdin fi stennija. Waħda mid-dimenssjoni ta’ ħajjitna hija d-dimensjoni tal-Avvent: adventus, li tfisser miġja, u l-istennija li ġejja u konnessa ma’ miġja. Ġesù għad jiġi fil-glorja.
Elf u seba’ mitt sena ilu, f’Niċea, fit-Turkija tal-lum, f’Iznik – fil-post li fih iltaqgħu l-Papa Ljun XIV u l-Patrijarka Bartolomew I, nhar il-Ġimgħa 28 ta’ Novembru 2025 – li reġgħu tennew bil-Grieg, l-lingwa oriġinali li biha nkiteb, il-Kredu, dak li aħna nistqarru f’kull quddiesa nhar ta’ Ħadd – dan il-Kredu twieled fl-1700, fl-ewwel konċilju ta’ Niċea, imsejjaħ mill-Imperatur Kostantinu, bis-sapport ta’ ommu Elena. F’dan il-Kredu, is-simbolu tal-Fidi tagħna, hemm miktub li Ġesù għad jiġi fil-glorja. B’hekk id-dimensjoni importanti ta’ ħajjitna hija din l-istennija tal-Mulej li jiġi fil-glorja.
Il-Mulej jiġi ukoll fil-ħajja personali tagħna, meta jiltaqa’ magħna biex jeħodna fl-għamara imħejjija għalina. Hemmhekk, għandna post merfgħuh. Nafu li l-Mulej se jiġi jħabbat fuq il-bieb ta’ qalbna. Waħda mit-talbiet li nħobb nirrepeti jiena personali, imma ngħallimha ukoll lill-poplu tiegħi, hija din: “meta trid, imma m’iniex mgħaġġel.”
Imma l-Mulej għadd jiġi, u aħna nistennewh bit-tama u bil-ferħ ta’ laqgħa ma’ ħalliel tajjeb. Hu jgħid fl-Evanġelju li huwa jiġi bħal ħalliel (ara Mt 24:43). Jista’ jiġi meta l-inqas tistennieh. Ilkoll kemm aħna għaddejna mill-esperjenza – iżjed ma jgħaddi ż-żmien aktar ngħaddu minnhom – ta’ familjari u ta’ kollegi li llum hawn u għada ma nsibuhomx hawn, forsi f’mumenti li ma stennejniex. Anke meta jkun hemm mumenti li l-mewt inkunu qegħdin nistennewha; forsi tkun pjanat li tmur tara lil xi ħadd, imma mbagħad iċemplulek u jgħidulek li m’għadux magħna. Inti jiddispjaċik li ma tkunx hemm f’dak il-mument imma hekk tidħol fil-misteru tal-Mulej li jiġi bħal ħalliel, mingħajr avviż għax dak huwa l-mument fundamentalment tiegħu, meta hu jiltaqa’ magħna personalment, u jiġi jiltaqa’ magħna ta’ ħbieb tiegħu.
Ta’ ħabib li hu, jgħidilna għixu f’din id-dinja bħala wlied id-dawl, tkunux parti mid-dlam. Ippermettuli nirringrazzja lil Din l-Art Ħelwa talli fl-istorja ta’ pajjiżna – wara kollox intom twelidtu ftit wara l-kisba tal-Indipendenza – intom fl-istorja ta’ pajjiżna intom dawl, ta’ min iħobb il-patrimonju tagħna, u jxammar il-kmiem biex jiddefendih, iħarsu, jirrestawrah u jagħtih id-dinjità li kellu minn dejjem.
Nixtieq ngħidilkom storja li laqtitni ħafna u li sirt nafha minn Għawdxi. Din il-persuna qaltli storja li weġġgħatni, fetħitli għajnejja, urietni wkoll f’liema perikli konna 60 sena ilu, u mil-liema periklu nħlisna, anke bl-inizjattiva tagħkom u nies bħalkom. Sittin sena ilu, wara l-kisba tal-Indipendenza, il-Maltin ħassew li saru tassew is-sidien ta’ arthom, u kien hemm kuntrattur li qrib ix-Xagħra, Għawdex, sab ġebel maqtugħ lest.
U qal li ma kellux għalfejn joqgħod jonġor jew jaqta’ l-blat għax sabu lest. Dan kien it-Tempju tal-Ġgantija. Beda jħottu biex jużah għall-kostruzzjoni. Sakemm il-Gvernatur kiteb ittra lill-Prim Ministru – dak iż-żmien Ġorġ Borg Olivier – fejn qallu li huwa jifhem li issa kien kollox f’idejn il-Malti, imma nissuġġerixxi li t-tempju Neolitiku tieħdu ħsiebhom. Dan l-inċident laqqgħani mat-traġedja tal-injoranza, u l-fatt umiljanti li l-barrani kien japprezza iżjed x’għandna milli konna kapaċi napprezzawh aħna. Intom għalhekk paġna mill-glorja ta’ pajjiżna, għaliex mhux biss tagħrfu u għaraftu s-sbuħija ta’ dak li rċivejna mill-ġenerazzjonijiet ta’ qabel, imma wkoll għandkom it-tjubija u l-ġenorożità li nassiguraw dan il-patrimonju għall-ġenerazzjoni futuri. U f’dan is-sens intom dawl qawwi.
Intom taf ukoll li baqa’ ħafna xi jsir! Għadna ngħixu f’traġedji ta’ fejn jekk mhux l-injoranza, hija r-rebgħa, jew il-mistura tat-tnejn, li għandhom l-ikbar għedewwa tal-patrimonju tagħna u ta’ pajjiżna: l-injoranza u rebgħa. Jiena naħseb li min hu rgħib, huwa l-akbar injorant, għax l-ewwel nett jaħseb li mhux se jmut, u anke jaħseb li kollox se jieħu miegħu. Aħna ngħiduha: ‘Ma ħa xejn miegħu.’ Il-Papa Franġisku kien iħobb jgħid li l-kefen m’għandux bwiet. Ikeffnuk u jistgħu jpoġġulek affarijiet imma miegħek mhu se tieħu xejn.
Importanti ħafna li tassiguraw l-futur mhux biss għall-patrimonju tagħna, imma anke għall-għaqda. Qed nara ħafna nies li ilhom ħafna snin involuti magħkom. Imma tajjeb li jkollkom ġenerazzjonijiet żgħażugħa, ta’ voluntiera, ta’ nies li huma appassjonati bħalkom bil-patrimonju ta’ pajjiżna. Important ħafna li Din l-Art Ħelwa tassigura l-eżistenza tagħha fil-futur. Nirringrazzjaw lil Alla għal dak li sar, nifhem li għad baqa’ ħafna xi jsir, u għalhekk nitolbu l-għerf u d-dehen, hekk kif nitolbu fl-Innu Malti, li tant huwa għażiż għalina.
✠ Charles Jude Scicluna
Arċisqof ta’ Malta
Qari tal-quddiesa
Qari I: Iż 2:1-5
Salm: 121(122):1-2,4-5,6-7,8-9
Qari II: Rum 13:11-14a
L-Evanġelju: Mt 24:37-44
