L-omelija tal-Isqof Joseph Galea-Curmi

Illum niċċelebraw bil-ferħ il-Festa tal-Madonna tal-Providenza. B’qalbna nduru lejn Marija, Omm Ġesù, u nagħtuha qima bħala l-mara li kellha fiduċja sħiħa fil-ħarsien kollu mħabba ta’ Alla. F’Marija naraw Omm li timxi magħna, tfarraġna, u bil-ħlewwa twassalna għand il-Mulej li jipprovdi, jiggwida u qatt ma jabbanduna lil uliedu.

L-Evanġelju tal-lum, mal-ewwel daqqa t’għajn, jista’ jidher li qed jitkellem fuq xi ħaġa differenti. Ġesù jgħallimna x’għandna nagħmlu meta xi ħadd iweġġagħna jew jidneb kontra tagħna. Hu jitkellem dwar il-korrezzjoni ta’ xulxin, it-tfittxija għar-rikonċiljazzjoni, u l-ħarsien tal-għaqda fil-komunità.

Iżda, fil-fatt, dawn iż-żewġ temi – il-Providenza Divina u r-rikonċiljazzjoni – huma marbutin flimkien aktar fil-fond milli naħsbu.

Qiegħed jaħdem f’ħajjitna

Il-Providenza mhijiex sempliċement it-twemmin li Alla b’xi mod se jsolvi l-problemi kollha tagħna. Il-Providenza Divina tfisser li nafdaw li Alla qiegħed jaħdem b’mod attiv f’ħajjitna, anke fis-sitwazzjonijiet diffiċli u ta’ tbatija. Xi drabi l-ħarsien mimli mħabba ta’ Alla jasal għandna permezz ta’ ċirkustanzi mhux mistennija. Xi drabi jasal għandna permezz tal-persuni li hu jqiegħed f’ħajjitna. U xi drabi, kif jgħallimna l-Evanġelju tal-lum, il-Providenza ta’ Alla ssejħilna biex aħna stess insiru strumenti tal-ħarsien tiegħu għal xulxin.

Ġesù jgħidilna: “Jekk ħuk jaqa’ f’xi dnub, mur sibu waħdu u widdbu” (Mt 18:15). Kemm hu differenti dan mill-mod kif ġieli nirreaġixxu! Meta xi ħadd iweġġagħna, xi kultant nitkellmu ma’ kulħadd ħlief mal-persuna kkonċernata. Nistgħu nħallu r-riżentiment jikber fina. Nistgħu niġġudikaw, nikkritikaw jew nitbiegħdu. Iżda Ġesù jurina triq oħra: mur għand ħuk jew oħtok. Tkellem b’imħabba. Fittex il-fehim. Agħti ċans lir-rikonċiljazzjoni.

Din hija l-Providenza fl-azzjoni. Alla jieħu ħsieb il-poplu tiegħu mhux biss permezz tal-mirakli, iżda wkoll permezz ta’ qlub lesti li jaħfru, jisimgħu, jikkoreġu bil-ħlewwa, u jibqgħu fidili lejn xulxin.

Ħajja ta’ fiduċja

Marija stess fehmet dan il-misteru fil-fond. Ħajjitha kollha kienet att ta’ fiduċja fil-Providenza ta’ Alla. Fit-Tħabbira tal-Anġlu, hija ma kinitx taf kull dettall ta’ dak li kellu jġib il-futur. Ma kellhiex it-tweġibiet kollha. U madankollu qalet: “Ħa jsir minni skont kelmtek” (Lq 1:38).

F’Betlehem, hija baqgħet tafda f’Alla. Matul il-ħarba lejn l-Eġittu – u hawn niftakru li f’dal-post, il-knisja ta’ qabel din kienet iddedikata lill-Madonna fil-ħarba lejn l-Eġittu – hija baqgħet b’din il-fiduċja f’Alla. F’Nazaret, fis-snin sempliċi u moħbija tal-ħajja tal-familja, kellha din il-fiduċja f’Alla. U f’riġlejn is-Salib, meta kollox kien jidher mitluf, Marija baqgħet tafda. Il-Madonna tal-Providenza Divina tfakkarna li l-fidi ma tfissirx li jkollna mappa sħiħa tal-futur. Il-fidi tfisser li nagħrfu lil dak li jmexxina, anke meta t-triq ma tkunx ċara.

Forsi dan hu messaġġ importanti għal ħafna minna llum. Hemm mumenti meta nistaqsu: Fejn qiegħed imexxini Alla? Għaliex qed jiġri dan? X’se jiġri mill-familja tiegħi, minn saħħti, minn xogħli, mill-futur tiegħi, mir-relazzjonijiet tiegħi? Marija tweġibna bil-ħlewwa, mhux bilfors bi spjegazzjonijiet, imma bil-preżenza tagħha u bl-eżempju tagħha: Afda f’Alla. Alla jara dak li int ma tistax tara. Alla jaf dak li int ma tafx. Alla diġà qiegħed fil-futur li jinkwetak.

Permezz tal-komunità

Iżda l-Evanġelju tal-lum ifakkarna wkoll li l-Providenza ta’ Alla ħafna drabi taħdem permezz tal-komunità. Ġesù jgħid: “Fejn tnejn jew tlieta jkunu miġbura f’ismi, hemm inkun jien f’nofshom” (Mt 18:20). 

X’wegħda sabiħa! Aħna m’aħniex maħluqin biex nimxu waħedna. Alla ħafna drabi jurina l-ħarsien tiegħu permezz tal-Knisja, permezz tal-familja, permezz tal-ħbieb, permezz ta’ dawk li jitolbu magħna u joqogħdu ħdejna.

U Marija, Omm il-Providenza, hija wkoll mogħtija lilna bħala Omm. Omm mhux dejjem tneħħi kull diffikultà mill-ħajja ta’ wliedha. Iżda timxi magħhom. Tfarraġhom. Tħeġġiġhom. Tgħinhom jibqgħu mexjin ’il quddiem.

Il-ħarsien providenzjali ta’ Marija dejjem iwassalna lejn Ġesù. Hi qatt ma titlobna nieqfu fiha. Bħalma qalet fit-Tieġ ta’ Kana: “Agħmlu kulma jgħidilkom hu” (Ġw 2:5). Dan hu l-qalb tad-devozzjoni Marjana. Marija taqbadna minn idna u twassalna għand Ġesù. Meta nkunu konfużi, hija tindikalna lilu. Meta nibżgħu, hija tgħallimna nafdaw fih. Meta nkunu mifrudin, hija ssejħilna mill-ġdid għall-għaqda. Meta nitilfu t-tama, hija tfakkarna li Alla għadu jaħdem. L-Evanġelju jitkellem b’saħħa dwar ir-rikonċiljazzjoni għaliex l-għaqda hija prezzjuża għal Alla.

Forsi, f’din il-festa, nistgħu naħsbu f’xi ħadd li għandna bżonn nirrikonċiljaw ruħna miegħu, xi ferita li għadna nġorru, xi ħadd li evitajna minflok ma tkellimna miegħu b’onestà u mħabba.

Marija, il-Madonna tal-Providenza, tgħallimna biex ma nħallux il-biża’ jew il-kburija jikkontrollaw ħajjitna. Hija tgħallimna nqiegħdu wkoll ir-relazzjonijiet miksura tagħna f’idejn Alla u nagħmlu dak li nistgħu biex nerġgħu nibnu l-paċi. Xi drabi r-rikonċiljazzjoni tkun diffiċli. Xi drabi tieħu ż-żmien. Iżda nistgħu nafdaw li kull meta nfittxu bis-sinċerità l-verità, il-maħfra u l-paċi, Alla jkun qiegħed jaħdem.

Illum ejjew nerġgħu nafdaw lilna nfusna fil-Providenza mimlija mħabba ta’ Alla. Nitolbu lil Marija tgħinna nafdaw meta ma nifhmux, nibqgħu fidili meta t-triq tkun diffiċli, u nsiru strumenti tal-ħarsien mimli mħabba ta’ Alla għall-oħrajn. 

Jalla l-Madonna tal-Providenza Divina tħares lill-familji tagħna, lil din il-parroċċa għażiża tas-Siġġiewi, lill-komunità kollha, u lil dawk kollha li huma mħassbin dwar il-futur. U jalla tgħallimna nagħrfu li l-Providenza ta’ Alla mhux dejjem tkun drammatika jew spettakolari. Xi drabi nsibuha f’kelma li tasal fil-ħin, f’qalb li taħfer, f’ħabib fidil, f’komunità li titlob, jew fis-saħħa kwieta li tagħtina l-kuraġġ nagħmlu pass ieħor ’il quddiem.

Hekk kif ninġabru madwar dan l-artal, niftakru fil-wegħda ta’ Ġesù: “Fejn tnejn jew tlieta jkunu miġbura f’ismi, hemm inkun jien f’nofshom”. Illum, aħna miġburin f’ismu. Marija hija magħna bħala Omm li tħobbna. U Alla tal-Providenza Divina qiegħed hawn jieħu ħsiebna, u jmexxina, pass pass, lejn il-pjan tiegħu mimli mħabba.

Madonna tal-Providenza, itlob għalina.

✠ Joseph Galea-Curmi 
    Auxiliary Bishop of Malta