L-omelija tal-Arċisqof Charles Jude Scicluna
Il-vers li l-kor kanta b’mod tant sabiħ qabel l-Evanġelju li għadna kemm smajna huwa vers tassew kommoventi li jiġbor l-esperjenza tal-mewt għal min jemmen.
Tenuisti manum dexteram mea (qbadtli idi u mexxejtni minn idejja)
Et in voluntate tua deduxisti me (ħadtni skont ir-rieda tiegħek)
Cum gloria assusisti me (dawwartni bil-ġieħ u l-glorja)
Din it-tama tagħna, aħna l-Insara meta quddiem il-fdalijiet ta’ Anthony illum, qegħdin nagħmlu talba lil Alla, għajn ta’ kull ħniena biex lil Anthony, li għaddieh minn din l-esperjenza, isir għalih faraġ, hena u sliem. Qbadtni minn idejja, mexxejtni minn idejja, ħadtni miegħek skont ir-rieda tiegħek.
Kemm hi ħaġa sabiħa li meta aħna naħsbu fuq il-mewt, ma naħsbux dwar bieb magħluq imma bieb imbexxaq li minnu Alla fil-ħniena tiegħu jnewwel idu, jaqbadna minn idejna b’dik il-ħatfa soda tiegħu u jmexxina skont ir-rieda tiegħu. Din l-espressjoni li Ġesù juża fl-Evanġelju mill-kapitlu 14 ta’ San Ġwann, li l-familja xtaqet li naqraw illum u li fih rifless l-esperjenza tal-mewt fid-dawl tal-fidi.
“Sejjer nħejjilkom post… nerġa’ niġi biex noħodkom miegħi biex fejn inkun jien, tkunu intom ukoll” (Ġw 14: 3-4). Din l-espressjoni Ġesù stess hu nnifsu jgħid biex jispjega l-proċess u l-esperjenza tal-mewt għal min jemmen. Fil-kelma ta’ Ġesù sseħħ il-wegħda li hemm fis-Salm 23: “He guides me in right paths for his name’s sake, even though I walk in the dark valley, I fear no evil for you are at my side” (Salm 23:3).
Din l-esperjenza straordinarja tal-proċess u l-esperjenza tal-mewt, il-Mulej qed jgħidilna: Jiena se nkun miegħek, se niġi niltaqa’ miegħek, se naqbdek minn idejk, ikunu xi jkunu ċ-ċirkustanzi, tkun fejn tkun, jiena ħejjejtlek għamara, ħejjejtlek post u issa wasal il-mument tal-laqgħa aħħarija tiegħek mal-ħajja għax il-laqgħa tan-Nisrani fil-mewt mhijiex laqgħa mat-tmiem imma laqgħa ma’ sid il-ħajja. Qbadtni minn idi, mexxejtni bi mħabba u ħniena.
“The Lord is my shepherd, only goodness and guideness follow me all the days of my life and I shall dwell in the house of the Lord for years to come” (Salm 23:6).
Din il-fidi li ċċelebrajna fil-qari tal-lum hija fidi li trid tkun wens għalina, tweżinna, tiggwidana imma timliena bit-tama li l-laqgħa tagħna fil-mewt hija laqgħa ma’ sid għaref, ħanin, li jiġġudikana fil-verità. X’inhi l-ikbar verità? Li aħna dgħajfa u midinbin u għandna bżonnu. Anke meta din għalina tbegħedna minnu, hu jkun dejjem magħna. Din il-verità straordinarja tal-eżistenza tagħna, ta’ kull wieħed u waħda minna u hu dejjem maġenbna. ‘You are at my side’.
Illum aħna u nitolbu għal Anthony, nitolbu li l-esperjenza li għadda minnha u qiegħed jgħaddi minnha fil-proċess tal-mewt, tal-ġudizzju u tal-laqgħa tiegħu ma’ Alla, isib lil Alla bl-ismijiet li għażel għal ibnu l-maħbub: Jeshua – Alla li jsalvak, li jħenn għalik u jerfgħek; Emmanuel – Alla miegħek.
Jalla li dan il-bniedem ġwejjed li qatt ma ried il-limelight, ta’ ftit kliem imma meta jiftaħ fommu hu ta’ kliem profond, jiltaqa’ mal-għerf veru. Anthony fil-professjoni tiegħu, u wkoll ikun ta’ sapport għal martu u ltaqa’ ma’ ħafna nies, ma’ ħafna Maltin u Għawdxin. Ilkoll ammirajna l-prudenza u d-diskrezzjoni ta’ Anthony; l-għażla tiegħu mhux tal-limelight imma ta’ ħajja trankwilla kemm jista’ jkun. Illum nixtiqulu l-mistrieħ fi ħdan il-Mulej.
Illum nitolbu għalih biex ikollu l-esperjenza ta’ dak il-mistrieħ ta’ dejjem li aħna nemmnu li huwa d-destin magħżul għalina. Mhux għax jistħoqqilna imma għax Alla għani fil-ħniena. Qbadtni minn idi, mexxejtni bi mħabba skont ir-rieda tiegħek, libbistni bil-glorja tiegħek. Jalla tkun din il-kelma għażiża li Anthony jisma’ tidwi fil-qalb tiegħu issa li ltaqa’ mas-Salvatur. Jalla hu jkollu l-faraġ ta’ min mgħannaq bil-ħniena t’Alla jagħraf li ħajtu kienet tassew sabiħa u li l-ħajja ta’ bla tmiem hija ħajja li għaliha verament hu msejjaħ. Għaliex aħna l-aħwa sew jekk ngħixu u sew jekk immutu, aħna mmarkati bis-salib tal-Mulej. Ħadd ma jgħix għalih innifsu, ħadd ma jmut għalih innifsu imma mmarkati bis-sinjal ta’ Ġesù, għandna din il-persważjoni, m’iniex waħdi. Il-Mulej huwa miegħi.
Agħtih O Mulej il-mistrieħ ta’ dejjem, id-dawl ta’ dejjem jiddi fuqu jistrieħ fi sliem. Ammen.
✠ Charles Jude Scicluna
Arċisqof ta’ Malta