Miguel Mifsud, li sena ilu għamel ġirja ta’ 100 kilometru madwar il-kosta ta’ Malta, dis-sena se jidħol għal sfida ħafna ikbar b’ġirja ta’ 100 mil, b’405 dawra mat-trakka tal-Mediterranean College of Sport bejn il-11 ta’ filgħodu tal-5 ta’ April, sal-11 ta’ filgħodu tal-għada 6 ta’ April, b’risq Caritas Malta.
Waqt konferenza tal-aħbarijiet, Anthony Gatt, Direttur ta’ Caritas Malta, rringrazzja lil Miguel Mifsud għall-impenn tiegħu u l-messaġġ ta’ tama li qed jgħaddi lil dawk li jixtiequ jinħelsu mid-dipendenza, billi jinkoraġġixxu l-attività fiżika bħala alternattiva.
Miguel Mifsud rringrazzja lil Caritas Malta u lil Sur Charlò Bonnici tal-Mediterranean College of Sport għall-appoġġ, u qal: “6 snin ilu ksibt ħajti lura wara 25 sena ta’ droga; grazzi lil Caritas u lil Alla, illum napprezza l-ħajja. L-isport dejjem kien importanti u wara ġirja ta’ 100km, din is-sena se nagħmel sfida ta’ 100 mil. Xejn mhu impossibbli jekk tkun determinat.” Stieden lil kulħadd jingħaqad miegħu fit-trakka bejn l-11 ta’ filgħodu tal-5 ta’ April u l-11 ta’ filgħodu tal-6 ta’ April.
Charlò Bonnici, CEO ta’ Mediterranean College of Sport qal: “Miguel huwa ispirazzjoni kbir għalina. Dan il-villaġġ sportiv, b’80 sena ta’ storja, jospita diversi dixxiplini, inkluż futbol, għawm, u atletika. Il-Kulleġġ żamm il-filosofija tal-Ġiżwiti – to be a man for others – u qed ngħadduha lit-tfal.”
Donazzjonijiet jistgħu jintbagħtu f’kont apposta ta’ BOV għal din l-attività bl-isem Giving back run, numru tal-kont IBAN: MT60VALL22013000000050020756300 jew fuq Revolut fuq 77070801.
Il-pubbliku hu mħeġġeġ ukoll li jagħti l-appoġġ tiegħu billi jimxi jew jiġri ma’ Miguel u jagħti donazzjoni fil-post.