“Meta jiġi missier ta’ tifel jew tifla jgħidli li missew max-xorb jew mad-droga fil-festa, jiena għalija nħossha. Ma nkunx tgħajtilha jien id-droga imma jien għandi sehem, xi ftit jew wisq, mir-responsabbiltà tagħha. Jew jiġi xi ħadd u jgħidlek isma’ hemm il-morda li qed jisimgħu dak id-damdim kollu ta’ sparar. M’għandi xejn kontra n-nar jekk isir b’mod moderat, sintendi. Dejjem jekk isir bħala espressjoni ta’ ferħ.”

L-Isqof ta’ Għawdex Anton Teuma qal dan waqt li kien intervistat waqt il-programm Għal Kulħadd fuq RTK103 ta’ Christine Delicata.

Mons. Teuma nsista li għandna verament naħsbu u nirriflettu kemm il-Knisja għadha parti mill-festa iktar mid-divertiment estern. Qal li filwaqt li ċ-ċelebrazzjonijiet esterni huma mill-isbaħ ma jfissirx li għandna niffukaw dwar min għandu l-isbaħ nar u min se jiċċelebra bl-iktar mod bombastiku.

“Il-festi huma xi ħaġa sabiħa iżda bħal kull ħaġa oħra hemm aspetti inqas sbieħ u distruttivi,” qal Mons. Teuma. “Sta għalina, għanda d-dmir essenzjali, li nippruvaw l-aspetti spiritwali mhux biss ma nittraskurawhx imma nħallulu post għalih.”

“Mal-ħafna junk food għandna nagħtu ftit vitamini”

Mons. Teuma spjega li l-ġimgħa tal-festa telqet minn ġol-knisja, minn figura ta’ qaddis jew persuni ta’ Trinità. Staqsa kemm il-Knisja għadha parti mill-festa llum il-ġurnata.

Kompla jgħid li t-tendenza tal-bniedem huwa l-estern, l-apparenza, il-poter, l-ekonomija, il-kultura – kollha affarijiet sbieħ u li jridu jkunu però meta npoġġuhom fuq nett jagħmluna skjavi, lsira.

“Waħda mill-preokkupazzjonijiet li nħoss fil-festi hija li nagħtu impenn lejn is-sustanza quddiem oħrajn li m’għandhomx daqstant sustanza,” qal Mons. Teuma.

L-importanza li kull persuna tibqa’ umli “biex ma ngħixux f’gidba”

Mistoqsi kif tista’ l-umiltà tibni l-persuna flok iddgħajjef, Mons. Teuma qal li l-umiltà mhix umiljazzjoni iżda mod kif aħna ma nemmnux li “kapaċi nikkontrollaw kollox” għaliex dan qatt ma jista’ jseħħ.

“L-umiltà hi din il-verità li lilna ma titfagħniex f’gidba li aħna kapaċi nikkontrollaw kollox,” qal l-Isqof.

Mons. Teuma kompla jirrifletti dwar l-attitudni tan-nies li qed turi li qed jonqos is-servizz ta’ qadi u ta’ għajnuna lejn l-oħrajn.

“Qed naraw bidla ta’ mentalità, fejn filwaqt li qabel kellna x-xorti li ngawdu l-preżenza tal-ġenituri, illum il-ġurnata mhux daqshekk. Filwaqt li qabel ma konniex naħsbuha darbtejn biex inkunu ta’ servizz għall-oħrajn, illum il-ġurnata t-tfal qed jitbiegħdu minn din l-esperjenza ta’ qadi għal dawk ta’ madwarna,” spjega Mons. Teuma.

L-Isqof Anton Teuma nsista li qed jinħass nuqqas tal-imħabba bejn persuna u oħra, bil-kuntentizza li bħallikieku saret l-uniku skop għall-ġurnata tagħna, iżda din qed tkun idea żbaljata.”B’dak il-mod naf, u nafu għax trabbejt fih,” qal Mons. Teuma.

“Minħabba li l-ħajja nbidlet l-ulied qed ikunu iktar ħin fiċ-childcares”

Huwa nsista li jaf li din il-bidla fil-mentalità ġejja fl-istil ta’ ħajja li qed ngħixu; stil ta’ ħajja li hu pjuttost differenti mill-passat. Mons. Teuma qal li filwaqt li qabel il-ġenituri kienu jkunu ħafna mill-ħin ma’ wliedhom iduru bihom, illum il-ġurnata, minħabba li l-ħajja nbidlet l-ulied qed ikunu iktar ħin f’childcares. Spjega kif qabel kienu jaraw lill-ġenituri li jaqduhom u jduru bihom minn ċkunithom, bit-tfal li kibru bil-mentalità li għandhom jagħmlu l-istess ma’ min ikun fil-bżonn.

“Inħoss li din l-attitudni li tagħmilna bnedmin, il-wiċċ tal-imħabba, qed tonqos xi ftit,” qal l-Isqof.

“Sitwazzjoni negattiva turina fuq xiex irridu naħdmu fir-relazzjoni”

Mons. Teuma tkellem ukoll dwar il-vaganzi li nqattgħu matul is-sajf flimkien ma’ qraba tagħna fejn saħaq li kull vaganza li tiġborna flimkien bħala familja hi waħda pożittiva, anke meta tispiċċa ħażin għaliex sitwazzjoni negattiva turina fuq xiex verament għandna naħdmu fir-relazzjoni tagħna. Fakkar li kunflitti dejjem jinqalgħu meta hemm differenzi li ma nifilħux għalihom iżda dan iwassal biex jgħinna għall-maturità ta’ kull persuna involuta.

Tkellem ukoll dwar l-importanza ta’ kunflitt fina nfusna għaliex dan għandu jgħinna nifhmu x’għandna nbiddlu personalment biex inkunu leali lejn dawk ta’ madwarna.

Indirizza wkoll id-diskors dwar l-ewtanażja fejn insista li jeħtieġ nifhmu liż-żgħażagħ u anke dawk il-persuni li għaddejjin minn żmien diffiċli biex jaqblu li jieħdu din l-għażla għaliex kull persuna tkun għaddejja minn perjodu partikolari li ma jkunux jifilħu iktar. Huwa fakkar f’Ġesù f’meta anke hu kien għaddej minn tbatija kbira iżda għażel li jgħid “missier f’idejk jien nerħi ruħi”.

“Iż-żagħżugħ li jfittex id-droga qiegħed ukoll ifittex lil Alla”

Mons. Teuma insista li x-xewqa u t-tiftix għall-vizzji kapaċi tfisser ukoll it-tiftix għal Alla.

“Nemmen li fil-qalb ta’ kull bniedem għandna xewqa għal Alla, qalb miftuħa li qed jistenna mingħand ħaddieħor, li huwa Alla l-imbierek,” qal Mons. Teuma. “Ma niddejjaqx ngħid li ż-żagħżugħ li jfittex id-droga qiegħed ukoll ifittex lil Alla.”

Tkellem ukoll dwar it-tranżizzjoni li l-Knisja qed tieħu f’dawn iż-żminijiet, b’għatx għal esperjenzi bażiċi mingħajr il-lussu li bħalissa qed ifittex il-bniedem.

“Inħoss li l-Knisja qiegħda fi żmien ta’ tranżizzjoni, mhux sempliċiment dwar x’jaħseb il-Papa jew l-isqfijiet, iżda mentalità li tinbena minn ġewwa, mhux bil-prietki iżda mill-qalb.”

Ara l-intervista sħiħa ma’ Mons. Teuma hawnhekk.

Source: Newsbook.com.mt

Article written by Christine Mamo