L-omelija tal-Isqof Joseph Galea-Curmi
Għeżież adulti kandidati għas-Sagrament tal-Griżma tal-Isqof, u intom ilkoll li qed tifirħu magħhom – illum f’din is-Solennità ta’ Għid il-Ħamsin, Pentekoste, il-Knisja kollha hija mistiedna tiftakar il-bidu tagħha, u aħna lkoll imsejħa naraw postna f’din l-istorja.
Il-Pentekoste: jum it-twelid tal-Knisja
Fil-Ktieb tal-Atti tal-Appostli naqraw li meta wasal il-jum tal-Pentekoste, “ġie mis-sema ħoss bħal ta’ riħ qawwi u mela d-dar kollha fejn kienu qegħdin. U dehrulhom ilsna qishom tan-nar, li tqassmu u qagħdu fuq kull wieħed minnhom” (Atti 2:2-3). L-Ispirtu ġarraf kull bieb magħluq, kull ostaklu ta’ lingwa, u d-dixxipli mbeżżgħin ħarġu fit-toroq jipproklamaw li Ġesù Kristu hu ħaj. Dan kien it-twelid tal-Knisja.
Għid il-Ħamsin mhix sempliċement tifkira storika; hija l-bidu li jibqa’ jgħix tal-Knisja. Kull meta l-Ispirtu nilqgħuh, il-paraliżi tinbidel f’azzjoni, il-biża’ f’kuraġġ, il-firda f’għaqda.
L-istess Ispirtu llum fostna
Dak l-istess nifs ta’ Alla għadu jaħdem f’ħajjitna llum. Tista’ ma tisma’ l-ebda riħ kbir u lanqas tara nar jaqbad fuq rasna, imma l-qawwa tal-Ispirtu hija daqstant reali. Fil-kwiet – permezz tal-Iskrittura, it-talb, u tant manjieri oħra – l-Ispirtu jibqa’ jittrasforma l-qlub.
Il-mirakli tal-Pentekoste jerġgħu jseħħu kull darba li Nsara fil-ħajja ordinarja ta’ kuljum jgħidu kelma ta’ maħfra, jaqdu lill-foqra, jaħdmu għall-ġustizzja, jiddefendu l-ħajja mill-ewwel mument tat-tnissil sat-tmiem naturali tagħha, jipproteġu l-ħajja tal-vulnerabbli, jew jegħlbu l-fruntieri tal-preġudizzju.
Il-Griżma: imseddqin bl-Ispirtu s-Santu
F’din iċ-ċelebrazzjoni, hawn numru ta’ adulti li se jirċievu s-Sagrament tal-Griżma tal-Isqof. Nixtieq nindirizza lilhom b’mod speċjali. Id-dilka mqaddsa timmarkakom għal dejjem – b’marka inviżibbli ta’ appartenenza. Il-magħmudija għamlitkom ħolqien ġdid; il-Griżma tagħtikom is-saħħa biex tgħixu din l-identità b’mod pubbliku, u tagħmlu dan mingħajr biża’.
Hi Pentekoste personalizzata: kif l-Ispirtu darba mexxa lill-appostli fit-toroq ta’ Ġerusalemm, u lilhinn ukoll, issa jmexxikom fil-postijiet tax-xogħol, fil-familji, fil-parroċċi, u fl-ispazji diġitali biex tkunu xhieda ta’ Ġesù Kristu llum.
Fidi adulta: magħżula u mibgħuta
Li tirċievu l-Griżma bħala adulti hija xhieda qawwija. Qegħdin tagħmlu din l-għażla konxja li tikkonferma dak li sar dak inhar tal-Magħmudija. Bħall-ewwel dixxipli, smajtu l-predikazzjoni tal-Knisja, irċevejtu l-Bxara t-Tajba, u sibtu lil Ġesù konvinċenti.
Il-vjaġġ tagħkom juri lid-dinja li l-fidi mhix ħsieb infantili jew xewqa vojta, imma laqgħa matura mal-Verità. U billi għażiltu lil Kristu bħala adulti, il-Knisja issa tagħżel lilkom, u tgħidilkom: “Ħudu s-siġill tad-don tal-Ispirtu s-Santu”.
Doni għall-missjoni, frott għall-ħajja
San Pawl jsemmi varjetà ta’ doni – għerf, fejqan, profezija, dixxerniment – imma “l-istess Ispirtu” huwa li jmexxi dawn id-doni kollha (1 Kor 12:4-11). Kunu miftuħa għal dak li l-Ispirtu s-Santu jrid jaħdem fikom. Il-ħidma tiegħu fikom dejjem tgħinkom biex tqiegħdu d-doni tagħkom għall-ġid għall-oħrajn.
San Pawl isemmi wkoll il-frott tal-Ispirtu, li intom imsejħin biex tgħixuhom fil-ħajja ordinarja ta’ kuljum: l-imħabba, l-hena, is-sliem, is-sabar, il-ħneina, it-tjieba, il-fidi, il-ħlewwa, ir-rażan (Gal 5:22-23). Dawn il-virtujiet ġejjin mill-Ispirtu, u jwasslu l-Evanġelju lil tant nies.
Nibnu l-għaqda fid-diversità
Ġerusalemm, dak inhar ta’ Pentekoste, kienet bħal ġabra ta’ nazzjonijiet – kif smajna fil-qari tal-Atti tal-Appostli, nies ġejjin minn tant postijiet differenti – imma l-istess messaġġ instema’ b’mod ċar f’kull lingwa. L-Ispirtu s-Santu għaqqad flimkien id-diversità kbira li kien hemm.
Pajjiżna jirrifletti din it-taħlita ta’ kulturi u stejjer. It-tentazzjoni hi li ninqatgħu fi gruppi għalina – il-Malti, il-barrani, il-migranti, il-ġenerazzjoni diġitali, l-anzjani. Imma l-Ispirtu jħobb id-diversità: jagħmel armonija minn vuċijiet differenti. Il-Griżma tagħkom timpenjakom biex tirreżistu kull forma ta’ tribaliżmu – politiku, etniku jew ekkleżjastiku – u biex tibnu pontijiet ta’ ftehim u għaqda.
Marija u s-Sala ta’ Fuq
San Luqa jżid dettall żgħir imma importanti ftit qabel il-ġrajja tal-Pentekoste: “ilkoll qalb waħda kienu jitolbu flimkien ma’ xi nisa u ma’ Marija, omm Ġesù, u ma’ ħutu. (Atti 1:14). Marija hija l-qalba kontemplattiva tal-Pentekoste – hu għalhekk, fil-fatt, li l-għada ta’ Pentekoste niċċelebraw il-festa ta’ Marija Omm u Xbieha tal-Knisja.
Marija tfakkarna li n-nar jitqabbad mis-silenzju ta’ ġewwa. Jekk tridu li l-Ispirtu jibqa’ jaqbad fikom, agħmlu spazju kuljum għat-talb, l-Iskrittura u l-Ewkaristija. Is-sagramenti mhumiex ċelebrazzjonijiet tal-gradwazzjoni; huma dawk li jagħtu l-ossiġenu lill-ħajja spiritwali. Nixtieq nagħmel enfasi partikulari fuq il-quddiesa tal-Ħadd. F’Jum il-Mulej, hu jsejħilna biex ninġabru flimkien ħalli nisimgħu l-Kelma tiegħu, nieħdu sehem fl-Ewkaristija, u ninbnew bħala komunità. Ħudu dan l-impenn: li dejjem tieħdu sehem fil-quddiesa tal-Ħadd.
Tweġiba u offerta
Ftit mumenti oħra, il-Knisja titlob fuqkom: “Ibgħat fuqhom l-Ispirtu s-Santu biex ikun l-għajnuna u l-gwida tagħhom f’ħajjithom”. Hekk kif tisimgħu dawk il-kelmiet, nistedinkom tgħidu b’qalbkom: “Hawn jien Mulej – ibgħat lili.” Offru lill-Ispirtu l-istorja ta’ ħajjitkom, il-biżgħat, it-tamiet, il-pjanijiet, il-futur, ir-relazzjonijiet tagħkom. Xejn mill-istorja tagħkom m’hu moħli meta jiġi fikom l-Ispirtu. Hu dak li jġedded dejjem lil ħajjitkom.
Barka
Għeżież kandidati għall-Griżma tal-Isqof, illum il-Mulej Ġesù Rxoxt jonfoħ fuqkom in-nifs li darba nefaħ fuq l-appostli: “Ħudu l-Ispirtu s-Santu” (Ġwanni 20:22). Jalla dan in-nifs jagħtikom ilsien fil-lingwa tal-ħniena, kuraġġ favur il-ħajja, u mħabba li ma tinħakimx mill-għeja. U jalla l-ġemgħa kollha – msaħħa bil-“iva” tagħkom – terġa’ tiġġedded fil-Pentekoste tagħha, sabiex in-nies jaraw fina togħma tas-Saltna ta’ Alla.
Ejja, Spirtu s-Santu, imla l-qlub tal-fidili tiegħek, u kebbes fihom in-nar ta’ mħabbtek.
✠ Joseph Galea-Curmi
Isqof Awżiljarju