• Direttur: Sam Taylor-Johnson
      Atturi: Dakota Johnson, Jamie Dornan, Eloise Mumford, Luke Grimes, Rita Ora, Victor Rasuk, Max Martini, Dylan Neal, Callum Keith Rennie u Jennifer Ehle
      Ħin tal-Film: 125 min.
       
      Klassifika taċ-Ċensura: 18
      Klassifika tal-Knisja: AR

      Anastasia “Anna” Steele, studenta tal-letteratura, tintervista lil Christian Grey, sinjur kbir. Dan tagħmlu bħala favur għal Kate Kavanagh li kienet taqsam kamra magħha. Anna fl-ewwel laqgħa ma’ Grey tiltaqa’ ma’ bniedem sabiħ, brillanti u ta’ intimita tant li mill-ewwel tinġibed lejh u tinħakem minnhu.

      Sfortunatament, Anna kienet tfajla bla malizzja u innoċenti. Kellha ħerqa kbira li  tkun qrib tiegħu u ssir tafu iktar personalment. Grey jaqbel mall-proposta iżda fuq  il-kundizzjonjiet tiegħu. Grey kellu t-tendenza li jkun fil-kontrol  ta’ kollox u fuq  kulħadd. Hekk kif ir-relazzjoni bejn Grey u Anna tkompli tiżviluppa u tidħol iktar fil-fond, Anna ssir taf ħafna mis-sigrieti ta’ Grey, b’riżultat li hi tibda tesplora dak li hija tant kienet xtaqet fil-ħajja tagħha. Disgrazzjatament iżda, dan tagħmlu għas-skapitu tagħha stess għaliex hi ssir pupazza f’idejn bniedem sadistiku, ossessiv  u pervers għall-aħħar tant li xi xeni tal-film  huma  xeni li joqorbu iktar lejn il-pornografija. Ir-rumanż erotiku bejn Anna u Grey iseħħ  f’kamra mimlija għodda tal-metall għat-trażżin. Anna  sfortunatament iċċedi u tikkopera għal perverżjoni min-naħa ta’ Grey tant li anke tiffirma kuntratt wara xi ftit ta’ negozjati. X’effett ikollu dan il-kuntratt fuq il-ħajja ta’ Anna? X’kien il-passat ta’ Grey li ġabu  ġġib ruħhu hekk ma’ mara?
      ​
      Film erotiku Amerikan taħt id-direzzjoni ta’ Sam Taylor-Johnson, msejjes fuq it-triloġija ta’  novelli miktuba minn E. L. James, novelli u issa l-film tal-ewwel ktieb  li qajjmu tant kontroversji l-aktar f’dawn l-aħħar jiem kull fejn beda jintwera l-film.  Minħabba li l-film fih ħafna xeni ta’ sess eċċessiv, b’imġieba abbużiva li  xejn ma tixraq  lis-sess feminili minnaħa ta’ persuna għaliex għandha ħafna ġid u poter, tagħmel skjava sesswali, persuna mmatura, li nqabbdet fin-nasba tiegħu.  Il-film ukoll fih ħafna kliem goff. Ikun tajjeb li  l-film jarawh adulti b’riserva u maturi.