Archbishop’s Message on the occasion of the Consacration of S. Anne’s Church in Żebbiegħ, Mġarr

22 ta’ Settembru 2013

Ħuti, nibda biex ngħid li kull min ħa sehem biex jibni din il-knisja, diġa ħa sehem fil-konsagrazjoni. Kull ġebla li tqeghdet hawn, kull ħidma li intom għamiltu biex dan il-post jikber, intom ilkoll kontu qed tikkonsagrawh lil Alla, mhux għalina, imma għal Alla l-Imbierek biex imbagħad inkunu nistgħu niltaqgħu miegħu f’dan il-post. U nixtieq ngħidilkom prosit.  Jiena bħala Patri Pawl snin ilu min jaf kemm ġejt fis-sagrestija u għamilt il-quddies u min jaf kemm għamilt ukoll eżerċizzi qabel ma nbniet il-knisja. U allura huwa ferħ kbir għalija li illum qiegħed f’din il-knisja.

Jiena nixtieq li nieħu l-lezzjonijiet li smajna llum biex jagħtuna dawl fuq x’suppost tkun knisja kkonsagrata, artal ikkonsagrat lil Alla. Nibda mill-Vanġelu tal-lum; ir-rakkont ta’ Żakkew. L-istorja timxi fuq tlett punti differenti: xewqa li jara l-Mulej, stedina tal-Mulej Ġesù, u wara, laqgħa ma’ Ġesù. Dawn it-tlett aspetti għandhom ikunu fil-knisja. Il-knisja hija l-post fejn jiena u aħna niltaqgħu mal-Mulej Ġesù. Fil-kas ta Żakkew saret bidla kbira, għax kienet bidla ta’ rikonċiljazzjoni tal-Mulej. Fil-fatt, meta Żakkew iltaqa’ mal-Mulej dak kollu li f’ħajtu kkunsidrah li kien ħażin, dak neħħieh minnu. Mela din il-knisja, bħad-dar ta’ Żakkew, trid tkun dar ta’ rikonċiljazzjoni. Hawnhekk nilqgħu lin-nies li jridu jagħmlu ħbiberija mal-Mulej, forsi ħbiberija ġdida, u jgħixu f’dak id-dawl.

Fit-tieni lezzjoni tal-lum (1Pt 2, 1-10)  S. Pietru jgħidilna fuq il-Knisja. Jitkellem fuq il-ġebla li warrbu l-bennejja li tafu li kienet Ġesù, li mbagħad saret il-ġebla tax-xewka għax fuqha mbniet il-Knisja kollha. Kemm hu sabih toqgħod taħseb fuqha!  Dawk ma kellhomx knisja tal-ġebel, fi żmien S. Pietru. Ma kienx qed jgħidilhom għal knisja tal-ġebel imma qallhom: “intom tridu timbnew f’ġebel spiritwali ħalli tagħmlu tempju lil Alla”. Issa llum aħna għandna tempju li aħna nistgħu nifirħu bih, tempju tal-ġebel imma għad fadal l-iktar ħaġa importanti: li kull wieħed u waħda minnkom trid tkun ġebla ħajja propju fil-misteru ta’ dan it-tempju ta’ hawnhekk ħalli tibnu wkoll knisja spiritwali. Ħuti, x’valur jista’ jkollha knisja jekk ma jkollhiex dan it-tempju ħaj? X’valur jista’ jkollha? Issir biċċa mill-istorja, mużew,li fiha ma jkunx inbena dak li huwa t-tempju tal-Mulej. Għalhekk it-tieni ħaġa hija din: il-knisja hi l-post fejn aħna niltaqgħu biex inkunu nistgħu nagħmlu it-tempju tal-Mulej.

It-tielet riflessjoni li xtaqt li naqsam magħkom hija ta’ Salamun mill-ewwel lezzjoni. Salamun jibni tempju kbir u f’daqqa waħda jiġih id-dubju.  Jibda jgħidlu: “Mulej, allavolja bnejtlek tempju sabih, kif jista’ jkun li int tinżel hawn fuq l-art u tgħammar f’dan it-tempju?”  (ara 1 Slat 8,27)  Salamun kien kapaċi jistagħġeb għall-post li fih niżel il-Mulej, fit-tempju tagħhom. U allura anke aħna, it-tielet riflessjoni ħuti, kull darba li nidħlu hawnhekk, ejjew verament nistagħġbu! Aħna anzi nistagħġu iktar għaliex fit-tabernaklu, hemmhekk, hemm Sidna Ġesù Kristu fl-Ewkaristija. Għalhekk dan il-post ma jistax ikun bħal postijiet l-oħrajn. Dan huwa l-post fejn jgħammar Alla biex aħna nkunu nistgħu mmorru nzuruh u niltaqgħu mieghu. U għalhekk hemm bżonn li aħna ma jkollnix daqshekk kunfidenza żejda li qiesek qed tidħol xi mkien ieħor u mhux f’post qaddis. Hawnhekk irridu nidħlu bl-istagħġib fina li l-Mulej ġie biex jgħammar propju f’din id-dar.

Riflessjoni oħra li xtaqt li naqsam magħkom heħodha mill-kliem ta’ S. Pietru: “Intom” aħna “ġens maħtur, magħżul, saċerdozju rjali, nazzjon qaddis, poplu li Alla kiseb għalih biex jixxandar il-Vanġelu”. Araw ftit dal-kelmiet, kważi kważi bil-kemm temminhom. Aħna hekk ġens maħtur? Aħna poplu magħżul? Imma hekk qalilna l-Mulej u la qalilna l-Mulej aħna nemmnuh. U allura rrid ngħid – nifmuha sew – illum se nikkonsagraw din id-dar imma kontinwament, kull darba li nidħlu hawn biex ninvista lill-Mulej jew inkella biex nirċievu l-Ewkaristija,  aħna nkunu qed inkomplu l-konsagrazzjoni li se nagħmlu llum. Titfakru Salamun x’kien qallu lil Alla?  Qallu: “Mulej, dan it-tempju huwa tiegħek, imma kompli ftakar fina għax aħna m’aħniex kapaċi weħidna nkomplu nħalluh li jkun tempju li fih int tista’ tiġi mtellgħa u mgħolli bħala s-sultan tagħna”.

Dawn huma l-ħsibijiet li xtaqt li naqsam magħkom, forsi nerġa nirrepetihom. Fil-Vanġelu għandna: dan huwa post fejn aħna niltaqgħu mal-Mulej  u nirrikonċiljaw ruħna mal-Mulej. Hawnhekk jinsab il-Mulej bil-mahfra tiegħu. It-tieni: dan huwa l-post, jgħidilna San Pietru fejn il-bniedem irid ikun ġebla ħajja. Donnu jrid jgħid fil-knisja m’hemmx post għal ġebla mejta! Ġebla ħajja biex flimkien, kull wieħed u waħda minna nagħmlu tempju ħaj lil Alla l-Imbierek. Issada hu x-xogħġol ġdid tagħkom!  Diġa għamiltu ħafna sagrifiċċji, issa jonqoskom biex tagħmlu dan ix-xogħol.  It-tielet ħaġa li aħna rajna f’Salamun hija l-istagħġib. Imma kif jista jkun? Għamluha l-mistoqsija kultant lilkom infuskom ħalli jdawwalkom l-Mulej: imma kif jista Alla l-Imbierek jiġi fuq l-art bħala Ewkaristija u jibqa’ fostna? Ma nafux, imma nafu li hu veru u li hawn Ġesù u li aħna nibqgħu nistagħbu bih.

U l-aħħar riflessjoni: ejja ma niddejqux, ħuti, ngħidu li aħna poplu magħżul, li aħna saċerdozju qaddis għax il-Mulej fil-Magħmudija għamilna s-segwaċi tiegħu imma dawk li jridu jibnu s-Saltna tiegħu. Tiftakru kif spiċċat dik is-silta ta’ S. Pietru? Għalfejn intom sirtu dan kollu? Biex intom tkomplu xxandru l-Vanġelu tiegħu. Kemm hu sabih kieku minn hawnhekk noħorġu ngħidu: ‘jiena se nipprova biex imqar wieħed jew waħda li qegħdin bogħod minn Alla, inwassalhom biex huma wkoll iduqu dak li aħna llum qegħdin induqu l-konsagrazzjoni ta’ din il-knisja. Għalhekk nidħlu f’dan il-misteru u naħsbu, ħuti kull wieħed u waħa minna, u naħsbu fuq il-grazzja li nieżla fuq dan il-post, biex imbagħad tkun tista’ titqassam mal-poplu kollu.